رابطائي سرشتن ۾ معياري ، ڳُجهي ، ڀروسي جوڳي ، مختصر ۽ واضح پيغام ڏيڻ لاءِ هڪ اهڙي اُهڃاڻي ٻولي استعمال ڪئي ويندي آهي ، جيڪا مخصوص حلقي لاءِ رمز ڀرين مُحاورن ۽ اشاراتي انداز ۾ هڪ ڌُر جو موقف ٻيءَ ڌُر تائين ڪاميابيءَ سان پهچائي سگهندي آهي . اها ٻولي طئي ٿيل معيارن مطابق هوندي آهي ۽ ان جو هر معيار ڳڻي ڳوتي مقرر ڪيو ويندو آهي . ڳُجهي ٻوليءَ جو گهڻو استعمال جاسوسيءَ ، ايجادات ۽ فوجي شعبن ۾ ڪيو ويندو آهي. انهن شعبن ۾ ڪم ڪندڙ فردن ، ادارن ، تجربن ، ڪاررواين ۽ رٿابندين کي مخصوص نالا ڏئي اصل مقصدن جي ڀڃت (decipherment)کي ناممڪن بڻايو ويندو آهي ، ته جيئن گهربل نتيجا حاصل ڪري سگهجن. ٻي مهاڀاري جنگ ۽ سرد جنگ واري دور۾ هن فن ۾ تمام وڏي ترقي ٿي ۽ مختلف ڌرين انهيءَ فن جي سهاري وڏيون فوجي ، سياسي، سفارتي، سائنسي ۽ معاشي ڪاميابيون ماڻيون. Code Wordsجو ڳُجهي کان سواءِ پڌرو استعمال به ٿيندوآهي ، جنهن ذريعي ڪيترين سرگرمين کي بين الاقوامي سطح تي مخصوص نشانن جي حوالي سان مڃتا مليل هوندي آهي. ان ڏس ۾ ٽريفڪ جي اشارن کان وٺي فوجي تربيت ۽ سائنسي ايجادن سميت ڪيترا ئي شعبا اهم ليکيا وڃن ٿا.